ఫేస్‌బుక్ ఇండియా చీఫ్ అంఖీ దాస్ రాజీనామా.. పార్లమెంట్ కమిటీ ప్రశ్నించిన కొద్దిరోజుల్లోనే!

ఓ జాతీయ పార్టీకి లబ్ది చేకూర్చేలా వ్యవహరించినట్టు ఇటీవల ఫేస్‌బుక్‌పై ఆరోపణలు వెల్లువెత్తిన విషయం తెలిసిందే. దీనిపై దుమారం రేగుతున్న వేళ.. మంగళవారం అనూహ్య పరిణామం చోటుచేసుకుంది. భారత్, మధ్య ఆసియా పబ్లిక్‌ పాలసీ డైరక్టర్‌ అంఖీదాస్‌ తన పదవికి రాజీనామా చేశారు. ఈ విషయాన్ని ఫేస్‌బుక్‌ సంస్థ ఓ ప్రకటనలో వెల్లడించింది. ‘ప్రజాసేవపై ఉన్న ఆసక్తి మేరకే తన బాధ్యతల నుంచి వైదొలిగారు. అంతేకానీ ఎటుంటి వివాదాస్పద కారణాలు లేవు. ఫేస్‌బుక్‌ ఇండియాలో ఆమె 9 ఏళ్ల నుంచి ఉన్నారు. సంస్థ అభివృద్ధికి ఎంతో కీలక పాత్ర పోషించారు. కంపెనీకి గొప్ప సేవలు అందించారు. భవిష్యత్తులో ఆమె మరిన్ని విజయాలు సాధించాలి’ అని సంస్థ పేర్కొంది. అంఖీ దాస్‌పై ఆరోపణలు వచ్చిన కొద్ది నెలల్లోనే రాజీనామా చేయడం చర్చనీయాంశంగా మారింది. బీజేపీ నేతలకు సంబంధించిన విద్వేషపూరిత ప్రసంగాలపై పరిమితుల విషయంలో ఆమె‌ చూసీచూడనట్లు వ్యవహరించారని ఆగస్టులో వాల్‌స్ట్రీట్ జర్నల్‌ ప్రచురించింది. ఈ వ్యవహారంలో ఆమెతో పాటు ఫేస్‌బుక్‌ సంస్థ సైతం విమర్శలు ఎదుర్కొన్న విషయం తెలిసిందే. భారత్‌లో కొన్నివర్గాలకు అనుకూలంగా వ్యవహరిస్తోందంటూ ఫేస్‌బుక్‌పై ఆరోపణలు వెల్లువెత్తగా.. వాల్‌స్ట్రీట్ జర్నల్ కథనాన్ని ఉదాహరణగా చూపుతూ కాంగ్రెస్ విమర్శలు గుప్పించింది. ‘బీజేపీ నేతల విద్వేషపూరిత ప్రసంగాలను పక్కన పెడుతున్న ఫేస్‌బుక్.. కాంగ్రెస్ నేతలు ఒక్క చిన్న మాటన్నా, వాటిని విపరీతంగా ప్రచారం చేస్తోందని’ వాల్‌స్ట్రీట్ జర్నల్ తన కథనంలో పేర్కొంది. ‘భారత రాజకీయాల్లో విద్వేష ప్రసంగాల విషయంలో నిబంధనలు మారాయి.. సంస్థ ప్రధాన అధికారి ఈ నిర్ణయాలను వ్యతిరేకిస్తున్నారు’ అనే అర్థం వచ్చేలా రాసింది. బీజేపీ నేతలు చేసే అభ్యంతరకర వ్యాఖ్యలను ఫేస్‌బుక్ ప్రచారం చేయడం లేదని దుయ్యబట్టింది. ఈ విషయాన్ని భారత ఫేస్‌బుక్ విభాగానికి చెందిన ఓ ఉన్నతాధికారి ఎత్తి చూపినా యాజమాన్యం పట్టించుకోలేదని, బీజేపీకి అనుకూలంగా ఫేస్‌బుక్ వ్యవహరిస్తోందని ఆరోపించారు. ఈ కథనాన్ని ట్విట్టర్‌లో షేర్ చేసిన రాహుల్ గాంధీ, భారత్‌లో ఫేస్‌బుక్, వాట్స్ యాప్‌లను బీజేపీ, ఆర్ఎస్ఎస్‌లు నియంత్రిస్తున్నాయని ఆరోపించారు. ఈ విషయాన్ని అమెరికా మీడియా సైతం గ్రహించిందని, ఫేస్‌బుక్ గురించి అసలు నిజము ఇదేనని వ్యంగ్యాస్త్రాలు సంధించారు. వారి ప్రసంగాలు వైరల్ అవుతున్నాయని, విద్వేష ప్రసంగాలు మాత్రం బయటకు రావడం లేదని దుయ్యబట్టారు. కాంగ్రెస్ ఎంపీ శశి థరూర్ అధ్యక్షతన పార్లమెంటరీ ప్యానెల్ ఫేస్‌బుక్‌‌కు నోటీసులు పంపగా.. అంఖి దాస్‌కు బదులు భారత్ ఎండీ అజిత్ మోహన్ హాజరయ్యారు. ఢిల్లీ అసెంబ్లీ ప్యానెల్ కూడా తమ ఎదుట హాజరుకావాలని ఫేస్‌బుక్‌కు నోటీసులు పంపినా, హాజరుకాలేదు. అయితే, గతవారం మరో అంశంపై పార్లమెంటరీ ప్యానెల్ ముందు అంఖీ దాస్ హాజరుకాగా.. సమాచార గోప్యతపై రెండు గంటల పాటు ప్రశ్నించినట్టు తెలుస్తోంది.

from Telugu News | తెలుగు వార్తలు | Online Telugu News | Latest News in Telugu https://ift.tt/3jxSUja