దుబ్బాకలో ఏపీ సీఎం జగన్ ప్రస్తావన.. హరీశ్ హాట్ కామెంట్స్

దుబ్బాక ఉప-ఎన్నికల ప్రచారానికి ఆదివారం సాయంత్రంతో తెరపడనుంది. ఎన్నికల ప్రచారంలో టీఆర్ఎస్, బీజేపీల మధ్య మాటల యుద్ధం కొనసాగుతోంది. ఈ నేపథ్యంలో మరోసారి బీజేపీపై తెలంగాణ మంత్రి హరీశ్‌రావు విమర్శలు గుప్పించారు. వ్యవసాయ బోర్లకు మీటర్ల గురించి హరీశ్ మాట్లాడుతూ.. ఆంధ్రప్రదేశ్ ముఖ్యమంత్రి ప్రస్తావన తీసుకొచ్చారు. బీజేపీకి ఓటేస్తే వ్యవసాయ బోర్ల వద్ద మీటర్లు ఇస్తారని, ఇందుకు ఏపీ సీఎం జగన్‌ ఒప్పుకొని వాటిని షురూ చేశారని అన్నారు. ఈ చట్టాన్ని ముఖ్యమంత్రి కేసీఆర్‌ వ్యతిరేకించగా ఆంధ్రప్రదేశ్‌ సీఎం జగన్‌ శ్రీకాకుళం జిల్లాలో ప్రారంభించారని చెప్పుకొచ్చారు. మన సీఎం కేసీఆర్‌ మాత్రం నేను పెట్టను.. మాది రైతు ప్రభుత్వం.. పైసలు ఇవ్వకపోయిన ఫర్వాలేదు.. నేను మాత్రం మా బోరువద్ద రైతులకు 24 గంటల కరెంటు ఇస్తానంటున్నారని ఓటర్లను ఉద్దేశించి అన్నారు. కేంద్ర ప్రభుత్వ రైతు వ్యతిరేక విధానాలను అవలంబించడంలో భాగంగా మోటార్లకు మీటర్లు బిగించి బిల్లులు వసూలు చేయడానికి చట్టం తెచ్చిందని ఆరోపించారు. గతంలోనూ వ్యవసాయ బోర్లకు మీటర్ల విషయంలో ఏపీ సీఎంపై హరీశ్ ఆసక్తికర వ్యాఖ్యలు చేసిన విషయం తెలిసిందే. రైతు ఉపయోగించే ప్రతి బావికి, బోరుకు విద్యుత్‌ మీటర్‌ పెడితే.. తెలంగాణకు రూ.2500 కోట్లు, ఆంధ్రప్రదేశ్‌కు రూ.4వేల కోట్లు ఇస్తామని కేంద్రం చెప్పిందని.. తెలంగాణ ప్రభుత్వం తిరస్కరించిందన్నారు. కానీ రూ.4 వేల కోట్లకు ఆశపడిన ఏపీ ముఖ్యమంత్రి జగన్.. ఆ డబ్బు తెచ్చుకుని ఇప్పుడు మీటర్ల పేరుతో ఆంధ్రా రైతుల మెడకు ఉచ్చు బిగిస్తున్నారని వ్యాఖ్యానించారు. ఓ వైపు రైతును నిండా ముంచుతూనే.. మరోవైపు విద్యుత్‌ మీటర్ల పేరుతో వారి ఉసురు తీయాలని చూస్తున్నారని మండిపడ్డారు.

from Telugu News | తెలుగు వార్తలు | Online Telugu News | Latest News in Telugu https://ift.tt/3myd5PQ