ఐపీఎల్ 2020 సీజన్‌లో సన్‌రైజర్స్ హైదరాబాద్ వరుస పరాజయాలపై అభిమానులు గట్టిగా చురకలేస్తున్నారు. తొలి మ్యాచ్‌లో రాయల్ ఛాలెంజర్స్ బెంగళూరు చేతిలో 10 పరుగుల తేడాతో ఓడిపోయిన హైదరాబాద్.. శనివారం రాత్రి కోల్‌కతా నైట్‌రైడర్స్‌తో జరిగిన మ్యాచ్‌లో 7 వికెట్ల తేడాతో ఓటమిని చవిచూసింది. మ్యాచ్‌లో టాస్ గెలిచిన డేవిడ్ వార్నర్ సాహసోపేతంగా బ్యాటింగ్ ఎంచుకోగా.. టీమ్‌లో మనీశ్ పాండే (51: 38 బంతుల్లో 3x4, 2x6) మినహా ఎవరూ చెప్పుకోదగ్గ స్కోరు చేయలేకపోయారు. ఓపెనర్లు జానీ బెయిర్ స్టో (5: 10 బంతుల్లో), డేవిడ్ వార్నర్ (36: 30 బంతుల్లో 2x4, 1x6) తమ సహజశైలికి భిన్నంగా.. నెమ్మదిగా ఆడగా.. ఆఖర్లో సాహా (30: 31 బంతుల్లో 1x4, 1x6) టెస్టు తరహా ఇన్నింగ్స్‌తో విసుగెత్తించేశాడు. దాంతో.. చివరికి 142 పరుగులే సన్‌రైజర్స్ చేయగా.. సాహా బ్యాటింగ్‌‌ని నెటిజన్లు ఉతికారేస్తున్నారు. సన్‌రైజర్స్ హైదరాబాద్ జట్టు ఓపెనర్లు దూకుడు పెంచుతున్న దశలో తెలుగు కామెంటేటర్లు.. వారి బ్యాటింగ్ ప్రతిభ గురించి మాట్లాడగా తర్వాత బంతికే వారు ఔటైనట్లు ఆరోపిస్తున్న నెటిజన్లు.. మీ కామెంట్రీ ఆపండ్రా బాబోయ్ అంటూ ట్వీట్స్ చేస్తున్నారు. అలానే ఐపీఎల్ 2016 సీజన్‌ తరహాలోనే సన్‌రైజర్స్ వరుసగా బెంగళూరు, కోల్‌కతా చేతిలో ఓడిపోవడాన్ని ప్రస్తావిస్తున్న నెటిజన్లు.. హిస్టరీ రిపీట్ అవుతోందంటూ జోస్యం చెప్తున్నారు. ఆ ఏడాది బెంగళూరుతో ఫైనల్‌లో తలపడి టైటిల్ విజేతగా హైదరాబాద్ నిలిచిన విషయం తెలిసిందే. ఐపీఎల్ 2020లో వరుసగా రెండు మ్యాచ్‌ల్లో ఓడిన సన్‌రైజర్స్ హైదరాబాద్.. పాయింట్ల పట్టికలో చిట్టచివరి స్థానానికి పరిమితమైంది. వాస్తవానికి పట్టికలో సన్‌రైజర్స్ చివరి స్థానంలో ఉంటుందని ఎవరూ ఊహించలేదు. దాంతో.. ఏదో ఏదో అనుకుంటాం.. అన్నీ జరుగుతాయా..! అంటూ బాలకృష్ణ డైలాగ్‌ని అభిమానులు పేలుస్తున్నారు. 143 పరుగుల లక్ష్యాన్ని శుభమన్ గిల్ (70 నాటౌట్: 62 బంతుల్లో 5x4, 2x6) అజేయ హాఫ్ సెంచరీ బాదడంతో కోల్‌కతా నైట్‌రైడర్స్ 18 ఓవర్లలోనే ఛేదించేసింది.
from Telugu News | తెలుగు వార్తలు | Online Telugu News | Latest News in Telugu https://ift.tt/336el5V
Comments
Post a Comment