ఐపీఎల్ 2020 సీజన్‌లో రాయల్ ఛాలెంజర్స్ బెంగళూరు టీమ్ సాహసోపేత నిర్ణయాలు తీసుకోబోతోందా..? 2008 నుంచి ఐపీఎల్ జరుగుతుండగా.. ఇప్పటి వరకూ ఒక్కసారి కూడా టైటిల్ విజేతగా నిలవని ఆర్సీబీ ఈసారి గట్టి పట్టుదలతో కనిపిస్తోంది. ఇప్పటికే ఆటగాళ్ల వేలంలో ఓపెనర్ అరోన్ ఫించ్, ఫాస్ట్ బౌలర్ డేల్ స్టెయిన్, ఆల్‌రౌండర్ క్రిస్‌ మోరీస్‌లను తీసుకుని జట్టుని బలోపేతం చేసుకున్న ఆర్సీబీ.. టీమ్ కూర్పులోనూ మార్పులు చేయాలని భావిస్తోంది. ఈ క్రమంలో సీనియర్ ఆటగాళ్లపైనా వేటు వేసేందుకు వెనుకాడబోమని పరోక్షంగా నెట్ సెషన్‌ నుంచే ఆర్సీబీ ఫ్రాంఛైజీ స్పష్టం చేసింది. దానికి ఉదాహరణ.. దక్షిణాఫ్రికా హిట్టర్ నెట్స్‌లో కీపింగ్ ప్రాక్టీస్ చేస్తుండటమే..! యూఏఈ వేదికగా సెప్టెంబరు 19 నుంచి ఐపీఎల్ 2020 సీజన్ జరగనుండగా.. ఇప్పటికే అక్కడికి చేరుకున్న బెంగళూరు టీమ్ క్వారంటైన్‌ని పూర్తి చేసుకుని నెట్స్‌లో ప్రాక్టీస్ మొదలెట్టింది. ఈ క్రమంలో తొలుత బ్యాటింగ్ ప్రాక్టీస్ చేసిన ఏబీ డివిలియర్స్.. అనంతరం కాసేపు వికెట్ కీపింగ్ ప్రాక్టీస్ కూడా చేశాడు. వాస్తవానికి బెంగళూరు టీమ్‌లో ప్రొఫెషనల్ వికెట్ కీపర్ రూపంలో పార్థీవ్ పటేల్ ఉన్నాడు. మరి ఏబీ డివిలియర్స్ కీపింగ్ చేయాల్సిన అవసరం ఏంటి..? అని సందేహాలు వ్యక్తమవుతున్నాయి. ఐపీఎల్ 2019 సీజన్‌లో 14 మ్యాచ్‌లాడిన ఓపెనర్ పార్థీవ్ పటేల్ 26.64 సగటుతో కేవలం 373 పరుగులే చేశాడు. ఇందులో రెండు హాఫ్ సెంచరీలు ఉండగా.. వికెట్ కీపర్‌గానూ అతను తేలిపోయాడు. దాంతో.. ఒకవేళ ఐపీఎల్ 2020 సీజన్ ఆరంభంలోనే పార్థీవ్ ఫెయిలైతే.. అతని స్థానంలో మరో భారత బ్యాట్స్‌మెన్‌ని టాప్ ఆర్డర్‌లో ఆడించి అతడ్ని కూర్చోబెట్టాలని విరాట్ కోహ్లీ భావిస్తున్నాడు. ఈ ఆలోచనలో భాగంగానే ఏబీ డివిలియర్స్‌‌ని కీపింగ్ ప్రాక్టీస్ చేయాలని సూచించినట్లు తెలుస్తోంది. అంతర్జాతీయ క్రికెట్‌కి రిటైర్మెంట్ ప్రకటించిన ఏబీ డివిలియర్స్.. గతంలో దక్షిణాఫ్రికా టీమ్ వికెట్ కీపర్‌గానూ పనిచేశాడు. దాంతో.. ఈ సఫారీ పవర్ హిట్టర్‌కి అదనపు బాధ్యతలు ఇవ్వబోతున్నట్లు తెలుస్తోంది.
from Telugu News | తెలుగు వార్తలు | Online Telugu News | Latest News in Telugu https://ift.tt/3lCVl5Z
Comments
Post a Comment