శనివారం దేశవ్యాప్తంగా దాదాపు 79వేల మందికి కొత్తగా వైరస్ నిర్ధారణ అయ్యింది. ఇప్పటి వరకూ మరే దేశంలోనూ ఒకే రోజు ఇంత పెద్ద సంఖ్యలో కేసులు నమోదుకాలేదు. దీంతో ఒక్క రోజు ఇంత పెద్ద సంఖ్యలో పాజిటివ్ కేసులు నమోదయిన దేశంగా భారత్ రికార్డు సృష్టించింది. తాజా కేసులతో దేశంలో బాధితుల సంఖ్య 3.5 మిలియన్లు దాటింది. గత వారం రోజులుగా రికార్డుస్థాయిలో కేసులు నమోదవుతున్నాయి. జులై 25న అమెరికాలో నమోదయిన 78,427 కేసులే అత్యధికం కాగా.. ప్రస్తుతం ఆ రికార్డును భారత్ శనివారం నాటి కేసులతో (78,903) అధిగమించింది. ఇక, గతవారం రోజులుగా మహమ్మారి మరింత విజృంభిస్తోంది. కేవలం ఏడు రోజుల్లోనే 4,96,070 కొత్త కేసులు బయటపడ్డాయి. పాజిటివ్ కేసులు మూడు మిలియన్లు దాటిన వారంలోనే 3.5 మిలియన్లకు చేరింది. రోజుకు సగటున 70,867 కేసులు నమోదవుతున్నాయి. ఇది కూడా ఓ ప్రపంచ రికార్డే. వారం రోజుల్లో దాదాపు ఐదు లక్షల కేసులు ఏ దేశంలోనూ నిర్ధారణ కాలేదు. శనివారం నాటి మొత్తం కేసుల్లో ఎప్పటిలాగే మహారాష్ట్ర తొలి స్థానంలో నిలిచింది. అంతేకాదు, ఏకంగా 16,867 మందికి కొత్తగా వైరస్ నిర్ధారణ అయ్యింది. ఇప్పటి వరకూ ఆగస్టు 26న అత్యధికంగా 14,888 కేసులు నమోదుకాగా.. శనివారం ఈ రికార్డు తుడిచిపెట్టుకుపోయింది. ఏపీలో వరుసగా నాలుగో రోజు 10వేలకుపైగా కేసులు నమోదయ్యాయి. జులై 29 తర్వాత తమిళనాడులో మరోసారి కోవిడ్ కేసులు 6వేలు దాటాయి. గడచిన నాలుగు రోజుల్లో 49వేల యాక్టివ్ కేసులు పెరిగాయి. దీంతో దేశంలో మొత్తం యాక్టివ్ కేసులు 7,66,226కి చేరాయి. దేశంలో మరో 64,681 మంది శనివారం కోలుకోగా.. కోలుకున్నవారి సంఖ్య 27,06,861గా నమోదయ్యింది. కోవిడ్ మరణాల విషయానికి వస్తే శనివారం మరో 945 మంది ప్రాణాలు కోల్పోయారు. ఐదు రోజుల తర్వాత 1,000లోపు నమోదుకావడం ఇదే తొలిసారి.
from Telugu News | తెలుగు వార్తలు | Online Telugu News | Latest News in Telugu https://ift.tt/2QFrpYE
Comments
Post a Comment