వారిద్దరూ స్కూల్‌కెళ్లే వయసు నుంచే ప్రేమించుకున్నారు. కులాలు వేరు కావడంతో యువతి కుటుంబ సభ్యులు అంగీకరించలేదు. దీంతో ఆర్యసమాజ్‌లో వివాహం చేసుకున్నారు. హైదరాబాద్‌లో ఇల్లు అద్దెకు తీసుకొని ఉంటున్నారు. కానీ పెళ్లయ్యి రెండు నెలలైనా గడవక ముందే.. యువతి కుటుంబ సభ్యులు బెదిరింపులకు దిగారు. దీంతో భార్య అతణ్ని వదిలి వెళ్లింది. ప్రేమించి పెళ్లాడిన భార్య తనను వదిలి వెళ్లడాన్ని తట్టుకోలేకపోయిన ఆ యువకుడు ఉరి వేసుకొని ప్రాణాలు కోల్పోయాడు. ఈ విషాద ఘటన వివరాల్లోకి వెళ్తే.. జనగామ జిల్లా లింగాలఘనపురానికి శివశంకర్, పారిజాత దంపతుల చిన్న కుమారుడు మహేశ్వరం కేదారీశ్వర్‌ (27). బాల్య స్నేహితురాల్ని ప్రేమించిన అతడు జూన్ పదో తేదీన ఆర్య సమాజ్‌లో వివాహం చేసుకున్నాడు. హైదరాబాద్‌లో ప్రయివేట్ ఉద్యోగం చేస్తుండటంతో కుషాయిగూడలోని ఓ అద్దె ఇంట్లో కాపురం పెట్టాడు. కాగా ఈ పెళ్లి ఇష్టం లేని భార్య కుటుంబ సభ్యులు యువకుడిని బెదిరించారు. దీంతో భార్యభర్తలిద్దరూ పెళ్లయిన కొద్ది వ్యవధిలోనే విడిపోయారు. ఎంతో ఇష్టపడి ప్రేమించి పెళ్లాడిన భార్య తనకు దూరం కావడాన్ని తట్టుకోలేకపోయిన అతడు తీవ్ర మనోవేదనకు గురయ్యాడు. మ్యారేజ్ సర్టిఫికెట్‌ను మెడలో వేసుకొని బలవన్మరణానికి పాల్పడ్డాడు. ఉరివేసుకొని ఆత్మహత్య చేసుకోవడానికి ముందు తన భార్యకు లేఖ రాశాడు. నువ్వు మరో పెళ్లి చేసుకొని సుఖంగా ఉండాలని ఆకాక్షించాడు. ఆ లేఖను స్వాధీనం చేసుకున్న పోలీసులు కేసు నమోదు చేసి దర్యాప్తు ప్రారంభించారు. బహుశా మిర్యాలగూడ ప్రణయ్ హత్య లాంటి ఘటనలు కళ్ల ముందు మెదలాడటంతో ఆ భార్య అతణ్ని వదిలేసి ఉంటుంది. తను దూరమైనా అతడు బతికి ఉంటాడు కదా అని భావించి ఉంటుంది. కానీ ఆ యువకుడు మాత్రం తట్టుకోలేకపోయాడు. భార్యాపై అమితమైన ప్రేమను పెంచుకున్న అతడు.. తను దూరం కావడంతో ఈ లోకంలో ఉండటం ఎందుకనుకున్నాడేమో. ఇలా తన జీవితానికి మరణ శాసనం రాసుకున్నాడు. ప్రాణం పోసే ప్రేమ.. పెద్దల ఒత్తిడితో ఇలా ప్రాణం తీసింది.
from Telugu News | తెలుగు వార్తలు | Online Telugu News | Latest News in Telugu https://ift.tt/3jIWWGJ
Comments
Post a Comment