టెలీహెల్త్‌ సర్వీసెస్‌తో మీకు బంధుత్వమా? అచ్చెన్నాయుడిపై ప్రశ్నల వర్షం

ఈఎస్‌ఐ కుంభకోణం కేసులో ఆరోపణలు ఎదుర్కొంటున్న మాజీ మంత్రి అచ్చెన్నాయుడిని ఏసీబీ అధికారులు అరెస్టు చేయగా.. కోర్టు ఆదేశాల మేరకు మూడు రోజుల కస్టడీకి తీసుకుని విచారించారు. గుంటూరు జీజీహెచ్‌లో చేపట్టిన విచారణ శనివారం ముగిసింది. చివరిరోజు సుమారు 4.30 గంటల పాటు విచారించిన అధికారులు.. అచ్చెన్నాయుడిపై ప్రశ్నల వర్షం కురిపించారు. మూడు రోజుల్లో 12.30 గంటలు పాటు విచారణ జరిపిన ఏసీబీ అధికారులు.. సిఫార్సు లేఖలు, ఆ సంస్థతో అచ్చెన్న, ఆయన ఓఎస్‌డీలకు ఉన్న సంబంధాలపైనే ఆరా తీశారు. అయితే, ఈఎస్‌ఐ ఆసుపత్రులకు అవసరమైన సేవలు, పరికరాలను తెలంగాణ ప్రభుత్వానికి సరఫరా చేసి మంచి సేవలు అందిస్తున్నామని టెలీహెల్త్‌ సర్వీసెస్‌ కంపెనీ.. ఏపీ ప్రభుత్వాన్ని సంప్రదించిన మీదటే అధ్యయనం చేయాలని, సిఫార్సు లేఖ ఇచ్చానని స్పష్టం చేసినట్లు సమాచారం. శనివారం జరిగిన విచారణలో టెలీహెల్త్‌ సర్వీసెస్‌ కంపెనీ నిర్వాహకులతో మీకు బంధుత్వమా? లేక టెండరు ఇస్తే వ్యక్తిగత లబ్ధి చేకూరుస్తామని సంస్థ యాజమాన్యం ఏమైనా ఆఫర్‌ ఇచ్చిందా? అని గుచ్చిగుచ్చి అడిగినట్లు తెలుస్తోంది. ఆ సంస్థ నుంచి పొందిన లబ్ధిని ఎవరెవరు, ఎంతెంత వాటాలుగా తీసుకున్నారని ప్రశ్నలు వేయగా..ఆ కంపెనీకి, తనకు ఎలాంటి సంబంధం లేదని, సేవలు అందిస్తామని ముందుకు రావడం వల్లే తాను సిఫార్సు లేఖ ఇచ్చానని అచ్చెన్నాయుడు వెల్లడించారని తెలిసింది. విచారణ ముగిసిందని, ఆదివారం కోర్టుకు నివేదిక అందజేస్తామని ఏసీబీ వర్గాలు తెలియజేశాయి. మూడు రోజుల విచారణలో అచ్చెన్నాయుడితో బలవంతంగా తప్పుజరిగిందని చెప్పించే ప్రయత్నం ఏసీబీ అధికారులు చేశారని, విచారణ అంతా ఆయనే లక్ష్యంగా సాగిందని అచ్చెన్న తరఫు లాయర్ హరిబాబు వివరించారు. ఈ కేసులో ఆయనకి ఎలాంటి సంబంధం లేదని, తుది తీర్పులో ఆయన నిర్దోషిత్వం బయటపడుతుందని అన్నారు. కాగా, అచ్చెన్నాయుడి జ్యుడీషియల్‌ రిమాండ్‌ను జులై 10 వరకు పొడిగిస్తూ విజయవాడలోని ఏసీబీ ప్రత్యేక కోర్టు ఉత్తర్వులు జారీచేసింది. తొలుత విధించిన 14 రోజుల రిమాండ్‌ గడువు శుక్రవారంతో ముగియడంతో ఈ మేరకు ఉత్తర్వులు జారీచేశారు.

from Telugu News | తెలుగు వార్తలు | Online Telugu News | Latest News in Telugu https://ift.tt/3g26KsH