ట్విట్టర్‌లో కరోనా నెగటివ్ రిజల్ట్.. హఫీజ్ అవసరమా..?: అక్తర్ చురక

కరోనా వైరస్ టెస్టింగ్ రిజల్ట్ అత్యుత్సాహంతో ట్విట్టర్‌లో పోస్ట్ చేసిన పాకిస్థాన్ సీనియర్ ఆల్‌రౌండర్ మహ్మద్ హఫీజ్ పెద్ద ఎత్తున విమర్శలు ఎదుర్కొంటున్నాడు. ఇంగ్లాండ్ టూర్‌కి ఎంపికైన 29 మంది ఆటగాళ్లకి గత సోమవారం కరోనా వైరస్ టెస్టులు చేయించిన పాకిస్థాన్ క్రికెట్ బోర్డు (పీసీబీ).. టీమ్‌లోని 10 మంది క్రికెటర్లకి కరోనా పాజిటివ్‌గా తేలినట్లు మంగళవారం ప్రకటించింది. ఇందులో మహ్మద్ హఫీజ్ కూడా ఉన్నాడు. పీసీబీ ప్రకటన తర్వాత రోజే ప్రైవేట్‌గా తన ఫ్యామిలీతో కలిసి మహ్మద్ హఫీజ్ కరోనా టెస్టులు చేయించుకోగా.. అందరికీ నెగటివ్ వచ్చింది. అదే విషయాన్ని ట్విట్టర్ ద్వారా హఫీజ్ వెల్లడించాడు. దాంతో.. మిగిలిన 9 మంది ఆటగాళ్లలో కంగారు మొదలైంది. బోర్డుకి తెలియకుండా హఫీజ్ సెకండ్ టెస్టు చేయించుకోవడం.. అదీ రిజల్ట్‌ని ప్రకటించడంపై పీసీబీ సీరియస్ అయ్యింది. క్రమశిక్షణ తప్పావంటూ చర్యలకి సిద్ధమైంది. హఫీజ్ అత్యుత్సాహం కారణంగా టీమ్‌లోని 9 మంది ఆటగాళ్ల నుంచి ఒత్తిడి పెరగడంతో శుక్రవారం మరోసారి 10 మంది నుంచి శాంపిల్స్ సేకరించిన పీసీబీ.. పరీక్షలు చేయించగా.. ఇందులో ఆరుగురికి నెగటివ్ అని తేలింది. ఇందులో హఫీజ్ కూడా ఉన్నాడు. అయినప్పటికీ.. ఇంగ్లాండ్ టూర్‌కి ఆదివారం బయల్దేరిన పాకిస్థాన్ జట్టుతో వారిని పంపలేదు. ఈ 10 మంది ఆటగాళ్లకి మరో రెండు సార్లు పరీక్షలు చేసిన తర్వాత నెగటివ్ వస్తే..? అప్పుడు పంపుతామని పీసీబీ స్పష్టం చేసింది. మహ్మద్ హఫీజ్ తొందరపాటుపై మాజీ ఫాస్ట్ బౌలర్ మాట్లాడుతూ ‘‘పాకిస్థాన్ క్రికెట్ బోర్డు, ఆటగాళ్ల మధ్య చిన్న కమ్యూనికేషన్ గ్యాప్ వచ్చినట్లు తెలుస్తోంది. టెస్టులు ముగిసిన తర్వాత హఫీజ్.. రీ టెస్టు చేసుకోవడాన్ని నేను వ్యతిరేకించడం లేదు. కానీ.. రిజల్ట్‌ని ట్విట్టర్ పోస్ట్ చేయడం సమంజసం కాదు. అది బోర్డు గురించి తప్పుడు సంకేతాలు ఇవ్వడమే అవుతుంది. పాకిస్థాన్ జట్టుకి ఇంగ్లాండ్ టూర్ చాలా కీలకం. మెరుగైన జట్టుని పంపి.. టెస్టు సిరీస్‌ని గెలవాలని పీసీబీ ఆశిస్తోంది’’ అని అక్తర్ వెల్లడించాడు.

from Telugu News | తెలుగు వార్తలు | Online Telugu News | Latest News in Telugu https://ift.tt/2VrOBww