పీవీ శతజయంతిపై కేసీఆర్ సమీక్ష.. ఏడాదిపాటు ఉత్సవాలు ఇలా..

శతజయంతిని తెలంగాణ ప్రభుత్వం ఏడాదిపాటు నిర్వహించాలని నిర్ణయించిన సంగతి తెలిసిందే. ఈ జయంతి ఉత్సవాల నిర్వహణకు సంబంధించి శనివారం ప్రగతి భవన్‌లో సీఎం ఉన్నత స్థాయి సమీక్ష నిర్వహించారు. ఉత్సవాల నిర్వహణ సందర్భంగా ఏ కార్యక్రమాలు నిర్వహించాలనే విషయంలో సమావేశంలో విస్తృతంగా చర్చించారు. పీవీ జన్మదినమైన జూన్ 28న హైదరాబాద్‌లోని పీవీ జ్ఞానభూమిలో ప్రధాన కార్యక్రమం నిర్వహించనున్నట్లు వెల్లడించారు. అదేరోజు ప్రపంచ వ్యాప్తంగా దాదాపు 50 దేశాల్లో పీవీ జయంతి వేడుకలు నిర్వహిస్తామని ప్రకటించారు. శత జయంతి ఉత్సవాల నిర్వహణకు తక్షణం రూ.10 కోట్ల కేటాయిస్తున్నట్లు ప్రకటించారు. ఈ సందర్భంగా సీఎం కేసీఆర్ ఉత్సవాల నిర్వహణ సందర్భంగా చేయాల్సిన కార్యక్రమాలను నిర్దేశించారు. * పీవీ జన్మదినమైన జూన్ 28 న హైదరాబాద్‌లోని పీవీ జ్ఞానభూమిలో శతజయంతి ఉత్సవాల ప్రారంభ కార్యక్రమం కోవిడ్ నిబంధనలు పాటిస్తూ, పరిమిత సంఖ్యతో జరుగుతుంది. ముఖ్యమంత్రి కేసీఆర్ ముఖ్యఅతిథిగా పాల్గొంటారు. * జూన్ 28న ప్రపంచ వ్యాప్తంగా దాదాపు 50 దేశాల్లో పీవీ జన్మదిన వేడుకలు జరపాలి. మంత్రి కేటీ రామారావు ఈ కార్యక్రమాల నిర్వహణను పర్యవేక్షిస్తారు. * పీవీకి తెలంగాణ రాష్ట్రంతోనే కాకుండా, ఆంధ్రప్రదేశ్, మహారాష్ట్ర, ఒరిస్సా తదితర రాష్ట్రాలతో కూడా అనుబంధం ఉంది. దేశ వ్యాప్తంగా అనేక మందితో అనుబంధం ఉంది. అనేక మంది అనుచరులు, సహచరులు, అభిమానులు ఉన్నారు. ప్రధానిగా, విదేశాంగ శాఖ మంత్రిగా సేవలందించడం వల్ల విదేశాల్లో కూడా ఆయనతో అనుబంధం కలిగిన వారున్నారు. కాబట్టి పీవీ జయంతిని రాష్ట్ర, అంతర్రాష్ట్ర, జాతీయ, అంతర్జాతీయ స్థాయిల్లో నిర్వహించాలి. ఎక్కడ ఏ కార్యక్రమం ఎలా నిర్వహించాలనే విషయంలో కార్యాచరణ రూపొందించాలి. * పీవీ శతజయంతి ఉత్సవాల నిర్వహణకు తక్షణం రూ.10 కోట్లను ప్రభుత్వం విడుదల చేసింది. రాబోయే రోజుల్లో నిర్వహించే కార్యక్రమాలను బట్టి, నిధులు విడుదల చేసుకుంటూ పోతాం. * ‘పీవీ తెలంగాణ ఠీవి’ అని ప్రతీ తెలంగాణ బిడ్డ గర్వపడేలా ఆయన చరిత్ర ఉంది. ఆయన గొప్పతనం, చేసిన సేవలు విశ్వవ్యాప్తంగా తెలిసే విధంగా అనేక విభిన్న కార్యక్రమాలను ఏడాది పొడవునా నిర్వహించాలి. * రామేశ్వరంలో మాజీ రాష్ట్రపతి అబ్దుల్ కలాం మెమోరియల్ పెట్టిన విధంగానే హైదరాబాద్ లో పీవీ మెమోరియల్ ఏర్పాటు కావాలి. కెకె నేతృత్వంలోని కమిటి సభ్యులు రామేశ్వరం వెళ్లి వచ్చి, పీవీ మెమోరియల్ ఎలా ఉండాలో ప్రభుత్వానికి సూచించాలి. * వివిధ సందర్భాలకు సంబంధించిన పీవీ ఫోటోలను సేకరించాలి. వాటిని భద్రపరచాలి. ఫోటో ఎగ్జిబిషన్ లు నిర్వహించాలి. * ఐదు కాంస్య విగ్రహాలను నెలకొల్పాలి. హైదరాబాద్, వరంగల్, కరీంనగర్, వంగరతో పాటు ఢిల్లీలోని తెలంగాణ భవన్ లో పీవీ విగ్రహాలు నెలకొల్పాలి. విగ్రహాల కోసం వెంటనే ఆర్డర్ ఇవ్వాలి. రాష్ట్ర అసెంబ్లీలో పీవీ చిత్ర పటాన్ని పెట్టాలి. * పీవీ బహుముఖ ప్రజ్ఞాశాలి. స్వతంత్ర్య సమరయోధుడుగా, రాజకీయ నాయకుడుగా, జర్నలిస్టుగా, బహుభాషా కోవిదుడుగా, రచయితగా సేవలందించారు. ఆయా రంగాల్లో ఆయన చేసిన కృషిని తెలిపే విధంగా అంతర్జాతీయ ప్రమాణాలతో ప్రత్యేక సావనీర్ తీయాలి. సావనీర్ మాత్రమే కాకుండా వివిధ రంగాల్లో చేసిన కృషి, వివిధ రంగాల ప్రముఖుల అభిప్రాయాలతో ప్రత్యేక సంచికలు రావాలి. * పీవీ తీసుకొచ్చిన ఆర్థిక సంస్కరణలు దేశ గతిని మార్చేశాయి. పీవీకి ముందు దేశ ఆర్థిక పరిస్థితి ఎలా ఉండేది? పీవీ తర్వాత దేశ ఆర్థిక పరిస్థితి ఎలా తయారైంది? అనే విషయాలను పొందు పరుస్తూ ప్రత్యేక సంచిక రావాలి. ఆర్థిక నిపుణులతో వ్యాసాలు రాయించాలి. * విద్యారంగంలో కూడా పీవీ ఎంతో కృషి చేశారు. సర్వేల్ లో మొదటి రెసిడెన్షియల్ స్కూల్ పెట్టారు. అది దేశంలో గురుకులాల స్థాపనకు నాంది పలికింది. దేశ వ్యాప్తంగా నవోదయ పాఠశాలలను నెలకొల్పారు. ఇలా విద్యారంగాభివృద్ధికి చేసిన కృషిని వివరించే విధంగా రచనలు చేయించాలి. ప్రత్యేక సంచిక తీసుకురావాలి. Must Read: * పీవీ నరసింహారావు దేశం గర్వించదగ్గ నాయకుడు. దేశ గతిని మార్చిన గొప్పవారు. భారతరత్న పురస్కారానికి సంపూర్ణ అర్హుడు. పీవీకి భారతరత్న ఇవ్వాలని డిమాండ్ చేస్తూ మంత్రివర్గం, అసెంబ్లీ తీర్మానం చేసి కేంద్ర ప్రభుత్వానికి పంపుతుంది. ప్రధాని వద్దకు నేనే (సిఎం) స్వయంగా వెళ్లి భారతరత్న ఇవ్వాలని విన్నవిస్తా. * యావత్ దేశ ప్రజలకు ఆయన గొప్పతనం చెప్పే విధంగా జాతీయ స్థాయిలో కార్యక్రమాలు నిర్వహించాలి. రాష్ట్రపతి రామ్ నాథ్ కోవింద్, ప్రధాన మంత్రి నరేంద్ర మోడిలను శత జయంతి ఉత్సవాల్లో పాల్గొనాలని ఆహ్వానించాలి. వారు పాల్గొనే కార్యక్రమాలు ఎలా ఉండాలో డిజైన్ చేయాలి. * భారత పార్లమెంటులో పీవీ చిత్రపటం పెట్టాలని కేంద్రాన్ని రాష్ట్ర ప్రభుత్వం తరఫున కోరతాం. * మాజీ రాష్ట్రపతి ప్రణబ్ ముఖర్జీ, మాజీ ప్రధాని మన్మోహన్ సింగ్ లతో పీవీకి ప్రత్యేక అనుబంధం ఉంది. వారిద్దరినీ కూడా భాగస్వాములను చేసే విధంగా ప్రత్యేక కార్యక్రమం రూపొందించాలి. * పీవీ గొప్ప సాహితీవేత్త. అనేక భాషలపై పట్టున్న పండితుడు. అనేక రచనలు చేశారు. శత జయంతి ఉత్సవాల సందర్భంగా పీవీ రాసిన పుస్తకాలను పునర్ముద్రించాలి. అముద్రితంగా ఉన్న వాటిని ముద్రించాలి. వాటిని లైబ్రరీలకు, విద్యా సంస్థలకు, ప్రముఖులకు ఉచితంగా పంపిణీ చేయాలి. ఈ బాధ్యతను సాహిత్య అకాడమీ, సాంస్కృతిక శాఖ తీసుకుంటుంది. * తెలంగాణలోనే కాక దేశ వ్యాప్తంగా పీవీ అభిమానులు, అనుచరులున్నారు. వారందరినీ సంప్రదించాలి. వారి సూచనలు తీసుకోవాలి. వారి అభిప్రాయాలను సావనీర్, ప్రత్యేక సంచికల్లో పొందు పరచాలి. వారిని జయంతి ఉత్సవాల్లో భాగస్వాములను చేయాలి. Must Read: * హైదరాబాద్, ఢిల్లీ, వరంగల్, కరీంనగర్, మంథని, బరంపురం, నాగపూర్ తదితర నగరాల్లో పీవీ కాలం గడిపారు. ఆయా సందర్భాల్లో ఆయనతో గడిపిన వారు, ఆయనతో అనుబంధం ఉన్నవారు ఉంటారు. వారినీ భాగస్వాములను చేయాలి. * బిల్ క్లింటన్, జాన్ మేజర్ లాంటి వివిధ దేశాల మాజీ అధ్యక్షులు, మాజీ ప్రధానులు, మంత్రులతో కూడా పీవీకి అనుబంధం ఉంది. వారి అభిప్రాయాలు కూడా సేకరించాలి. వీలయితే వారిని ఉత్సవాలలో భాగస్వాములను చేయాలి. * పీవీ గొప్పతనం దేశానికంతా తెలిసేలా దేశ వ్యాప్తంగా శత జయంతి ఉత్సవాల సందర్భంగా హోర్డింగ్స్ ఏర్పాటు చేయాలి. ఢిల్లీ, కలకత్తా, చెన్నయ్, బెంగులూరు తదితర నగరాల్లో హోర్డింగులు పెట్టాలి. హైదరాబాద్ లో కనీసం 100 చోట్ల హోర్డింగ్స్ ఏర్పాటు చేయాలి. * విద్య, సాహిత్య, రాజకీయ తదితర రంగాల్లో విశేష కృషి చేసిన వారిని ప్రత్యేకంగా గుర్తించడం కోసం పీవీ స్మారక అవార్డు నెలకొల్పాలి. క్రమం తప్పకుండా అవార్డులు ఇవ్వాలి. * విద్యాసంస్థలు పునఃప్రారంభం అయిన తర్వాత విద్యార్థులను భాగస్వాములను చేస్తూ ప్రత్యేక కార్యక్రమాలు నిర్వహించాలి. * రాష్ట్రంలోని ప్రతీ ఊరికీ పీవీ గొప్పతనం తెలిసేలా, ప్రజలంతా పీవీ ఘన చరిత్రను తెలుసుకునే ప్రత్యేక కార్యక్రమాలు రూపొందించాలి. అన్ని స్థాయిల అధికారులు, ప్రజాప్రతినిధులు అందులో భాగస్వాములు కావాలి. *పీవీ తెలుగువాడు. తెలంగాణ వాడు. జర్నలిస్టు. సాహితీవేత్త. కాబట్టి పీవీకి ఘనమైన అక్షర నివాళి అర్పించే విధంగా రచయితలు ప్రత్యేక రచనలు చేయాలి. కవులు పాటలు రాయాలి. పత్రికలు ప్రత్యేక వ్యాసాలు ప్రచురించాలని కోరుతున్నట్లు సీఎం కేసీఆర్ చెప్పారు. Must Read: Must Read:

from Telugu News | తెలుగు వార్తలు | Online Telugu News | Latest News in Telugu https://ift.tt/384LboC