భారత్‌తో జరిగిన 2011 వన్డే ప్రపంచకప్ ఫైనల్లో శ్రీలంక అమ్ముడుపోయిందంటూ సంచలన ఆరోపణలు చేసిన శ్రీలంక మాజీ స్పోర్ట్స్ మినిస్టర్ మహిందానంద అలుత్‌గమనె రోజుల వ్యవధిలోనే మాట మార్చేశాడు. ముంబయిలోని వాంఖడే వేదికగా జరిగిన ఆ మ్యాచ్‌లో 6 వికెట్ల తేడాతో గెలుపొందిన భారత్ జట్టు.. 28 ఏళ్ల సుదీర్ఘ నిరీక్షణ తర్వాత మళ్లీ వరల్డ్‌కప్‌ని ముద్దాడింది. కానీ.. ఆ మ్యాచ్‌పై తనకి అనుమానాలున్నాయని ఇటీవల చెప్పుకొచ్చిన మహిందానంద అలుత్‌గమనె.. క్రికెటర్లు మాత్రం ఆ ఫిక్సింగ్‌లో భాగం కాలేదని వెల్లడించాడు. ఫిక్సింగ్ ఆరోపణలన్ని సీరియస్‌గా తీసుకున్న శ్రీలంక ప్రభుత్వం విచారణ కోసం ప్రత్యేక దర్యాప్తు బృందాన్ని ఏర్పాటు చేసింది. దాంతో.. ఆ టీమ్ మహిందానంద అలుత్‌గమనె‌ని విచారించి.. అతని స్టేట్‌మెంట్‌ని రికార్డ్ చేసింది. విచారణలో భాగంగా ఫిక్సింగ్‌పై ఆధారాల్ని టీమ్ అడగ్గా.. అది తన అనుమానం మాత్రమేనని మాజీ మంత్రి చెప్పినట్లు తెలుస్తోంది. ఫిక్సింగ్‌పై ఏవైనా ఆధారాలుంటే బహిర్గతం చేయాలని ఇటీవల శ్రీలంక మాజీ క్రికెటర్లు మహేల జయవర్దనె, కుమార సంగక్కర డిమాండ్ చేసిన విషయం తెలిసిందే. ఆ మ్యాచ్‌లో టాస్ వద్దే కెప్టెన్లు మహేంద్రసింగ్ ధోనీ, కుమార సంగక్కర మధ్య కన్‌ప్యూజన్ కారణంగా రెండు సార్లు టాస్ వేయాల్సి వచ్చింది. ఆ తర్వాత శ్రీలంక తుది జట్టు ఎంపికపైనా ఆ దేశ మాజీ కెప్టెన్ అర్జున్ రణతుంగ అప్పట్లో ఆశ్చర్యం వ్యక్తం చేస్తూ.. మ్యాచ్‌లో ఫిక్సింగ్ జరిగినట్లు ఆరోపణలు గుప్పించాడు. ఆ తర్వాత ఆ దేశ క్రీడల మంత్రి స్వయంగా ఆరోపణలు చేయడంతో ఫైనల్ మ్యాచ్‌పై అందరిలోనూ సందేహాలు మొదలయ్యాయి. కానీ.. ఇప్పటి వరకూ సరైన ఆధారాలు లభించలేదు. ఆ మ్యాచ్‌లో ఫస్ట్ బ్యాటింగ్ చేసిన శ్రీలంక జట్టు.. మహేల జయవర్దనె (103 నాటౌట్: 88 బంతుల్లో 13x4) శతకం బాదడంతో 6 వికెట్ల నష్టానికి 274 పరుగులు చేసింది. అనంతరం లక్ష్యాన్ని భారత్ జట్టు.. గౌతమ్ గంభీర్ (97: 122 బంతుల్లో 9x4), మహేంద్రసింగ్ ధోని (91 నాటౌట్: 79 బంతుల్లో 8x4, 2x6) బాధ్యతాయుత ఇన్నింగ్స్‌లు ఆడటంతో 48.2 ఓవర్లలోనే 277/4తో ఛేదించింది.
from Telugu News | తెలుగు వార్తలు | Online Telugu News | Latest News in Telugu https://ift.tt/3i56UkI
Comments
Post a Comment