తిరుమల అఖండ జ్యోతిపై వదంతులు .. నమ్మొద్దంటున్న టీటీడీ

తిరుమల అఖండ దీపంపై వదంతులను నమ్మొద్దంటోంది టీడీపీ. స్వామివారి సుప్రభాతం నుంచి ఏకాంతసేవ వరకు అఖండ దీపం వెలుగుతూనే ఉంటుందని ఆగమశాస్త్ర సలహాదారు రమణ దీక్షితులు. వెంకన్న సన్నిధిలో అఖండ దీపం ఆరిపోయిందని తప్పుడు ప్రచారం జరుగుతోందని.. అందులో వాస్తవం లేదన్నారు. తిరుమలలో అఖండ జ్యోతికి సంబంధించిన అంశాలపై క్లారిటీ ఇచ్చారు. తిరుమల ఆలయంలో శ్రీవారికి జరగాల్సిన ఆగమోక్తమైన కైంకర్యాలన్నీ జరుగుతున్నాయన్నారు రమణ దీక్షితులు. గర్భాలయంలో రెండు అఖండ దీపాలుంటాయని.. అవి బయట నుంచి భక్తులకు కనిపించవన్నారు. గర్భాలయంలో రెండు నిలువెత్తు వెండి దీపాలు రెండు మూలల్లో ఉంటాయని.. ఇవి కాకుండా రెండు నందా దీపాలు స్వామి వారికి ఇరువైపులా వేలాడుతూ కనిపిస్తాయన్నారు. ఈ అఖండ దీపాలను ఉదయం సుప్రభాతంలో అర్చకులు బంగారు వాకిలి తలుపులు తెరిచి గర్భాలయ ప్రవేశం చేసినప్పుడు పరిచారకులు వెలిగిస్తారని చెప్పారు. ఇక రాత్రి ఏకాంత సేవలో స్వామివారు వేంచేసినప్పడు ఈ దీపాలను ఆర్పివేస్తారని రమణ దీక్షితులు తెలిపారు. మళ్లీ మరుసటి రోజు ఉదయం సుప్రభాతంలో తిరిగి వెలిగిస్తారని చెప్పారు. శ్రీవారి దేవాలయానికి ఎదురుగా ఉన్న బేడి ఆంజనేయస్వామి ఆలయం వద్ద అఖిలాండం అని భక్తులు పిలుచుకునే దీపారాధన ఉందని.. ఆలయానికి ఎదురుగా ఉన్న అఖిలాండం వద్ద భక్తులు కర్పూరం వెలిగించి, కొబ్బరి కాయలు కొట్టి మొక్కులు తీర్చుకుంటారని గుర్తు చేశారు. ఇప్పుడు భక్తులు లేకపోవడంతో అఖిలాండం వద్ద కర్పూర దీపం ఆరిపోయిందన్నారు.. ఈ విషయం తెలియక అందరూ కంగారుపడతున్నారన్నారు. అఖిలాండం ఆరిపోవడాన్ని అపచారంగా.. వైపరీత్యంగా భావించి పూజలు జరపాలని కొందరు సృష్టిస్తున్న వదంతుల్ని భక్తులు నమ్మొద్దన్నారు.

from Telugu News | తెలుగు వార్తలు | Latest News in Telugu https://ift.tt/2QOgnBa