నేడే 'సచివాలయ' నియామక పత్రాలు.. ఆలోగా ఉద్యోగాల్లో చేరాల్సిందే!

ఏపీలో అక్టోబరు 2 నుంచి అమల్లోకిరానున్న గ్రామ, వార్డు సచివాలయ వ్యవస్థలో ఉద్యోగాలకు ఎంపికైన అభ్యర్థులకు సెప్టెంబరు 30న నియామక పత్రాలు ఇవ్వనున్న సంగతి తెలిసిందే. విజయవాడలోని ఎ-ప్లస్‌ కన్వెన్షన్‌ హాలులో జరిగే కార్యక్రమంలో ఉదయం 10.30 గంటలకు రాష్ట్ర ముఖ్యమంత్రి జగన్‌మోహన్ రెడ్డి ఎంపికైన అభ్యర్థులకు నియామక పత్రాలు అందజేయనున్నారు. కృష్ణా, గుంటూరు జిల్లాలకు చెందిన దాదాపు 5 వేల మంది అభ్యర్థులు ఈ కార్యక్రమానికి హాజరుకానున్నారు. ఇక జిల్లాల్లో సంబంధిత మంత్రులు అభ్యర్థులకు నియామక పత్రాలు అందజేయనున్నారు. అయితే ఉద్యోగాలకు ఎంపికైన అభ్యర్థులు నెలరోజుల్లోగా విధుల్లో చేరాల్సి ఉంటుంది. లేదంటే వారి నియామకాన్ని రద్దు చేస్తారు. ఎంపిక జాబితా నుంచి వారి పేరును తొలగించనున్నారు. అభ్యర్థులూ ఇవి మర్చిపోకండి.. ➥ గ్రామ, వార్డు సచివాలయాల్లో విధుల్లో చేరే అభ్యర్థులు ఏదైనా గవర్నమెంట్ హాస్పిటల్ నుంచి ఫిజికల్ ఫిట్‌నెస్ సర్టిఫికేట్‌ను తప్పనిసరిగా అందజేయాలి. ➥ అభ్యర్థులు ఇప్పటికే ఏదైనా ప్రభుత్వ సంస్థల్లో, బ్యాంకులు, కార్పొరేషన్లలో పనిచేస్తున్న వారైతే.. ఆయా సంస్థలు ఇచ్చే ' లీవింగ్' సర్టిఫికేట్‌ను సమర్పించాల్సి ఉంటుంది. ➥ అభ్యర్థులు ఇచ్చిన సర్టిఫికేట్లు, డాక్యుమెంట్లు నకిలీ అని తేలితే.. వారిని ఉద్యోగం నుంచి తొలగించడంతోపాటు.. చట్టపరమైన చర్యలు తీసుకుంటారు. ➥ ఎంపికైన అభ్యర్థులకు రెండేళ్ల ప్రొబేషన్ పీరియడ్ ఉంటుంది. ఈ సమయంలో వారికి నెలకు రూ.15 వేలు వేతనం చెల్లిస్తారు. ఆ తర్వాతి కాలంలో పనితీరు ఆధారంగా రెగ్యులర్‌ సర్వీసులోకి శాశ్వత స్కేలులో తీసుకుంటారు. ➥ సరైన పనితీరు కనబర్చని అభ్యర్థులను ఉద్యోగం నుంచి తొలగిస్తారు. ప్రొబేషన్ సమయంలో ఎలాంటి నోటీసులు ఇవ్వకుండా తొలగించే అధికారం ప్రభుత్వానికి ఉంటుంది. అదే విధంగా నిబంధనలు, పరిమితులకు విరుద్ధంగా వ్యవహరించే ఉద్యోగులను ఒక నెల నోటీస్ పీరియడ్‌తో ఉద్యోగం నుంచి తొలగిస్తారు. ➥ ఉద్యోగంలో చేరిన మూడేళ్ల కాలంలో.. విధి నిర్వహణలో విఫలమైనా, ఉద్యోగం వదిలి వెళ్లాలనుకున్న అభ్యర్థులు ప్రభుత్వం నుంచి అప్పటిదాకా అందుకున్న మొత్తాన్ని (జీతభత్యాలు) వెనక్కి ఇచ్చేయాల్సి ఉంటుంది.

from Telugu News | తెలుగు వార్తలు | Latest News in Telugu https://ift.tt/2nGRknM